Halartan Falasdinawa 50,000 a Sallar Juma'a a Masallacin Al-Aqsa
Kamar yadda shafin yada labarai na “Palestine Online” ya bayar da rahoto, farfajiya da harabar masallacin Al-Aqsa sun cika makil da masallata da suka zo wannan masallacin mai alfarma tun da sanyin safiya domin gabatar da sallar Juma’a.
Duk da tsananin takunkumin da yahudawan sahyuniya suka yi a birnin Quds, masallatan Falasdinawa sun isa wannan masallaci daga yankunan da aka mamaye da kuma garuruwa daban-daban na gabar yammacin gabar kogin Jordan, dan halartar sallar Juma'a a wannan mako a masallacin Al-Aqsa.
Dangane da haka ne, sashen bayar da tallafin Musulunci na Qudus ya sanar da cewa, kusan masallata dubu 50 ne suka halarci sallar Juma'a a yau a masallacin Al-Aqsa.
Wannan dai na faruwa ne duk da cewa sojojin mamaya na Isra'ila sun aiwatar da tsauraran matakai a birnin Quds tare da hana dubban Falasdinawa da ke zaune a yankunan da aka mamaye a shekara ta 1948 da gabar yammacin kogin Jordan shiga birnin Quds domin halartar sallar Juma'a.
Sojojin yahudawan sahyoniya sun rufe titunan da ke kan tsohon bangaren Quds da masallacin Aqsa tare da yiwa dimbin masu ibada tambayoyi.
Har ila yau, dubban mutane daga yankuna daban-daban na Falasdinu sun gudanar da sallar asuba a masallacin Al-Aqsa a yau.
A baya dai kungiyar gwagwarmayar Musulunci ta Palastinu ta Hamas ta yi kira da a yawaita sallar asuba a masallacin Aqsa a wannan Juma'a, domin kare masallacin Al-Aqsa da kuma tinkarar mamayar mamaya da hare-haren yahudawan sahyuniya.
